खोटाङ । हलेसी तुवाचुङ नगरपालिकाले आर्थिक वर्ष २०८०÷०८१ को लागि ७७ करोड ६४ लाख ८९ हजार बराबरको बजेट पारित गरेको छ । सङ्घीय सरकार र प्रदेश सरकारबाट राजश्व बाँडफाँड, वित्तीय सामान्यीकरण, विशेष अनुदान, समपूरक अनुदान र सशर्त अनुदान शीर्षकमा प्राप्त बजेट समायोजन गरेर योजना तर्जुमा समितिका संयोजक एवम् उपप्रमुख रमेशकुमार राउतले पेश गर्नुभएको बजेटलाई १३ औँ नगरसभाबाट पारित गरेको हो ।

नगरपालिकाले शिक्षालाई पहिलो प्राथमिकता दिँदै २५ करोड ७७ लाख ८० हजार बजेट विनियोजन गरेको छ । त्यस्तै, कृषि तथा पशु साझेदारी कार्यक्रमका लागि  दुई करोड ४९ लाख, महिला बालबालिका तथा लक्षित वर्ग कार्यक्रमका लागि  एक करोड ४९ लाख र स्वास्थ्य तथा आयुर्वेदका लागि  एक करोड ३६ लाख ५० हजार रकम विनियोजन गरिएको उपप्रमुख राउतले प्रस्तुत गर्नुभएको बजेट वक्तव्यमा उल्लेख छ ।

नगर समपूरकमा  तीन करोड ६९ लाख ५० हजार विनियोजन गरेको नगरले विभिन्न वडा कार्यालय निर्माणका लागि रु दुई करोड, प्रशासकीय भवन निर्माणका लागि  एक करोड विनियोजन गरेको छ । नगर सडक निर्माणका लागि रु ५० लाख, सुरक्षित नागरिक आवास मर्मत संम्भारका लागि  ५० लाख, पर्यटन, धार्मिक तथा सँस्कृति संरक्षणका लागि ५३ लाख विनियोजन गरिएको छ ।