खोटाङ । नेपाल सरकार, गृह–मन्त्रालयले शाखा अधिकृत वा कायममुकायम शाखा अधिकृतको व्यवस्था नगर्दा खोटाङका दुवै इलाका प्रशासन कार्यालयको सेवा अवरुद्ध भएको छ । इलाका प्रशासन कार्यालय ऐसेलुखर्कको गत मङ्सिर–१८ गतेदेखि र इलाका प्रशासन कार्यालय खोटाङबजारको सेवा यही पुस–२४ गतेदेखि पूर्णरुपमा अवरुद्ध भएको हो ।

अहिले दुवै इलाका प्रशासन कार्यालयमा नागरिकता वितरण, दलित जनजाति प्रमाणीकरण एवम् सिफारिश, नाबालक परिचयपत्र प्रदान लगायतका सम्पूर्ण प्रशासनिक सेवा रोकिएको छ । ऐसेलुखर्कका नायब सुब्बा राजेन्द्र भुर्तेलको कायममुकायम शाखा अधिकृत अवधि मङ्सिर–१७ गते सकिएपछि दैनिक सेवा प्रभावित भएको हो ।

इलाका प्रशासन कार्यालयको सेवा अवरुद्ध हुँदा गाउँपालिकाका सातवटै वडाका नागरिक डेढ महिनादेखि मारमा परेको गाउँपालिका प्रमुख गिरेन्द्रबहादुर राई बताउनुभएको छ । इलाका प्रशासन कार्यालय ऐसेलुखर्कबाट नागरिकता सिफारिश लगायत प्रशासनिक सेवा रोकिएपछि प्रमुख जिल्ला अधिकारी सन्तबहादुर सुनारले ऐसेलुखर्क पुगेर पुस–४ र ५ गते सेवा दिनुभएको थियो ।

नासु भुर्तेलको कायममुकायम अवधि सकिएकै दिन जिल्ला प्रशासन कार्यालयले गृह मन्त्रालयलाई कायममुकायम अवधि सकिएको जानकारी दिए पनि हालसम्म कुनै सुनुवाइ नभएको समाचार स्रोतले जनाएको छ । “शाखा अधिकृतको व्यवस्था गर्न वा कायममुकायम अधिकृत नियुक्त गरिदिन पुस–१६ गते पनि मन्त्रालयलाई पत्राचार गरेका थियौँ । तर, हालसम्म पत्रको सुनुवाइ भएको छैन”, जिल्ला प्रशासन कार्यालका एक अधिकृतले भन्नुभयो, “गृह–मन्त्रालयले दीर्घकालीन समस्या समाधान गर्नुपर्छ । म्यादी शाखा अधिकृत अधिकृतको जिम्मेवारी दिइरहे पुनः समस्या दोहोरी रहन्छ ।”

यस्तै, गृह–मन्त्रालयले इलाका प्रशासन कार्यालय, खोटाङ बजारमा कार्यरत नायब सुब्बा मोहनबहादुर राईलाई छ महिनाका लागि दिएको कायममुकायम अवधि सकिएपछि नागरिकता वितरण लगायतका प्रशासनिक सेवा रोकिएको छ । यसअघि शाखा अधिकृत नहुँदा गत असार–२६ गतेदेखि इलाका प्रशासन कार्यालयको सेवा रोकिएको थियो ।

गृह–मन्त्रालयले बढीमा छ महिनाका लागि नासु राईलाई कायममुकायम मुकर्रर गरेर पत्र पठाएपछि साउन–२२ गतेदेखि नागरिकता वितरण लगायत सेवा  शुरू गराइएको थियो । सो कायममुकायम अवधि पुस–२० गते सकिएको जनाइएको छ ।

कार्यक्रमका सिलसिलामा खोटाङ बजार पुग्नुभएका प्रमुख जिल्ला अधिकारी सुनारले पुस–२१ र २२ गते नागरिकता जारी गर्नुभएको थियो । खोटेहाङ गाउँपालिका–७, खोटाङ बजारमा रहेको इलाका प्रशासन कार्यालयको सेवा बन्द हुँदा खोटेहाङ, जन्तेढुङ्गा गाउँपालिका र बराहपोखरी गाउँपालिकाका २१ वडाका सेवाग्राही मारमा परेका छन् ।

इलाका प्रशासन कार्यालय खोटाङबजारको सेवा अवरुद्ध भएपछि सेवाग्राहीहरु काम नगरी फर्कन बाध्य भएको नेपाली काँग्रेस जन्तेढुङ्गा गाउँपालिका सभापति बाजिन्द्र विष्टले बताउनुभयो । “पुस–२४ गते इलाका प्रशासन कार्यालय खोटाङबजार पुगेको थिएँ । त्यो दिन २२ जना सेवाग्राही काम नगरी फर्कन बाध्य भएका थिए”, उहाँले भन्नुभयो, “यो म्यादी कार्यालयबाट कहिलेदेखि जनताले ढुक्कसँग सेवा लिन पाउने ? एकैदिन २२ जना सेवाग्राही काम नै नगरी फर्किनु परेको दुःखद खबर छ । कतिको, कति अप्ठ्यारो परिस्थिति पनि हुन्छ । खोइ त सरकारले कुरा बुझेको ?”

मन्त्रालयले इलाका प्रशासन कार्यालयमा जिम्मेवार कर्मचारीको व्यवस्था नगर्दा अत्यावश्यक कामका लागि सेवाग्राही जिल्ला प्रशासन कार्यालय दिक्तेल पुग्नुपर्ने बाध्यता छ । इलाका प्रशासन कार्यालयको सेवा पुनः सञ्चालनमा ल्याउन सम्बन्धित निकायमा पहल भइरहेको खोटेहाङ गाउँपालिका प्रमुख उदिम राई ‘मुक्ति’ले बताउनुभएको छ ।