खोटाङ । जिल्लाको खोटेहाङ गाउँपालिकाले कृषि सञ्जाल गठन गर्न थालेको छ । गाउँपालिकाको कृषि शाखा र कृषकबीच पुलको भूमिका निर्वाह गर्नको लागि कृषि सञ्जाल गठन गर्न थालेको हो ।
गाउँपालिकाले चालु आर्थिक वर्षको स्वीकृत कार्यक्रम अनुरुप कृषि सञ्जाल गठन गर्न थालिएको गाउँपालिका कृषि अधिकृत केशबकुमार झाकाले बताए । गाउँपालिकाले सोमबारदेखि वडा- ४ बडकादियालेबाट सञ्जाल गठन गर्न शुरु गरेको हो ।
गाउँपालिकाले प्रत्येक वडामा एक एक वडा कृषि सञ्जाल गठन गरिने र आगामी फागुन ११ गतेसम्म गाउँपालिकामा ९ वटा कृषि सञ्जाल गठन हुने छ । कृषि सञ्जालको लागि १८ देखि ६० वर्षसम्मका व्यक्तिलाई सदस्य बनाइने छ । सञ्जालको अध्यक्ष तथा उपाध्यक्षसहित ९ देखि ११ जनासम्मको सदस्य रहने व्यवस्था कार्यविधिले गरेको छ । जसमा ३५ प्रतिशत महिलाको सहभागिता हुनुपर्ने छ ।
गाउँपालिका अध्यक्ष तथा उपाध्यक्ष सञ्जालको आमन्त्रित सदस्यको रुपमा रहने अधिकृत झाको भनाइ छ । कृषि सञ्जालमा कृषि पेशा गर्दै आएका, कृषि विज्ञ तथा कृषिसम्बन्धी ज्ञान भएका व्यक्तिलाई प्राथमिकता दिने दिने बताइएको छ ।
