खोटाङ । जिल्ला स्वास्थ्य कार्यालय खोटाङले दादुरा–रुबेला खोप अभियान सञ्चालन गर्ने भएको छ । ‘पूर्ण खोप सुरक्षित भविष्य’ भन्ने नारासहित आगामी फागुन २९ देखी चैत्र ३ गतेसम्मजिल्लाका दशवटै स्थानीय तहमा ९ महिनादेखि ५ वर्षमुनिका बालबालिकालाई खोप लगाउन अभियान सञ्चालन गरिने भएको जिल्ला स्वास्थ्य कार्यालय खोटाङका प्रमुख जीवन चौलागाँईले जानकारी दिनुभयो ।
दादुरा–रुबेला खोप अभियान खोप अभियानको अवधिमा जिल्लामा ३९२ वटा खोप केन्द्रमार्फत १४ हजार ८२ जना बालबालिकालाई खोप लगाउने लक्ष्य राखिएको प्रमुख चौलागाँईले बताउनुभयो । खोप अभियानमा ५ वर्षमुनिका बालबालिकालाई छुट भएको नियमित खोप पनि लगाइने छ । जिल्लामा ३९२ जना स्वास्थ्यकर्मी परिचालन गरिने छ । प्रमुख चौलागाँईले भन्नुभयो ।
सन् २०२६ सम्म दादुरा–रुबेला रोग निवारण गर्न नेपाल सरकारको प्रतिबद्धता रहेकोमा नियमित दादुरा–रुबेला खोपको कभरेज ९५ प्रतिशतभन्दा कम भएको कारण खोप अभियान चलाउन लागिएको बताइएको छ ।