खोटाङ, १२ फागुन । खोटाङमा कुकुरको टोकाइबाट ६७ वर्षीय वृद्धाको मृत्यु भएको छ । दिक्तेल रुपाकोट मझुवागढी नगरपालिका-१४ बुइपामा कुकुरको टोकाईबाट ६७ वर्षीय वृद्धाको मृत्यु भएको हो ।
रेबिजका कारण बृद्धाको मृत्यु भएको अस्पताल स्रोतले जनाएको छ । बृद्धाको मृत्यु भएपछि गाउँमा क्रास फैलिएको स्थानीयबासिन्दाले बताएका छन् । काठ्माण्डौंमा उपचारका क्रममा फागुन ६ गते बिरामीको मृत्यु भएको जनाइएको छ । वृद्धालाई कुकुरले टोकेको ७/८ घण्टापछि जिल्ला अस्पताल दिक्तेलमा पुर्याएर एन्टी रेबिज भ्याक्सिन लगाउँदा पनि बिरामीलाई बचाउन नसकिएको आफन्त सोनाम राईले बताउनुभयो । वृद्धाको मृत्यु भएपछि परिवार तथा छरछिमेकका आफन्त सबैभन्दा बढि त्रसित छन् । वृद्धालाई हलेसी तुवाचुङ नगरपालिका-११ राजापानीबाट डुल्दै आएको कुकुरले गत माघ ५ गते दाहिने हातमा टोकेको पारिवारीक श्रोतले जनाएको छ ।
एन्टी रेबिज भ्याक्सिनको तीन वटै मात्रा पुरा गरेपनि टोकेको २०/२२ दिनपछि घाउमा अधिक दुखाई सुरु भएको थियो । टोकेको २८/२९ दिनतिर घाउ भएका दाहिने हात चल्नै छाडेपछि बिरामीलाई टिचिङ अस्पताल पुर्याइएको थियो । टिचिङले टेकुमा रेफर गरे लगत्तै बिरामीको मृत्यु भएको हो ।
कुकुरले टोक्ने वित्तिकै दिइनुपर्ने खोप नपाउँदा बिरामीको मृत्यु भएको अस्पतालले जवाफ दिएको राईले बताएका छन् । ‘कुकुरले टोक्ने वित्तिकै रोकथामका लागि छुट्टै खोप दिइनुपथ्र्यो रे ।’ त्यही भएर एन्टी रेबिज भ्याक्सिन लगाउँदा पनि बिरामी निको नभएको अस्पतालले जवाफ दिएको छ । उहाँले भन्नुभयो, “कमसेकम जिल्ला अस्पतालले यत्ती जानकारी दिएको भए पनि बिरामीलाई बचाउन सकिन्थ्यो । आफन्त गुमाउन पर्दैनथ्यो भन्ने हाम्रो बुझाई छ ।”
यता, जिल्ला अस्पताल खोटाङका प्रमुख डा. बैभव मल्लिकले भने बिरामीलाई ढिलागरी अस्पताल पुर्याएकाले एन्टी रेबिज भ्याक्सिनले काम नगरेकाले वृद्धाको मृत्यु भएको हुनसक्ने जानकारी दिनुभयो ।
