खोटाङ, १६ चैत । खोटाङको रावावेँसी गाउँपालिका-४ डुम्रेधारापानीमा नवनिर्मित आधारभूत स्वास्थ्य केन्द्रको पक्कि भवन उद्घाटन गरिएको छ । मंगलबार एक कार्यक्रमको आयोजना गरी दुई तले पक्कि भवन रहेको सात कोठे आधारभूत स्वास्थ्य केन्द्रको पक्कि भवन रावाबेँसी गाउँपालिका प्रमुख लिलानाथ निरौलाले रिवन काटेर उद्घाटन गर्नुभयो ।
स्वास्थ्य मन्त्रालयको ३७ लाख ६० हजारको लागतमा निर्माण गरिएको स्वास्थ्य केन्द्रमा पालिकाले तीन जना कर्मचारीलाई नियुक्ती गरी एक अहेव, एक अनमी र कार्यालय सहयोगीको स्वास्थ्य केन्द्र सञ्चालनमा ल्याइएको रावाबेँसी गाउँपालिकाका प्रमुख प्रशासकीय अधिकृत रेखबहादुर थापाले बताउनुभयो ।
डुम्रेस्वास्थ्य संस्था आउन करिव दुई घण्टा पैदल हिडेर आउनु पर्ने बाध्यताको अन्त्य भएको छ । प्रमुख निरौलाका अनुसार, “अब आमनागरिकलाई सहज तरिकाले उपचार गराउनका लागि नागरिकको पायक पर्ने ठाउँमा स्वास्थ्य संस्थाको स्थापना भई सञ्चालनमा आएपछि साविकको डुम्रेधारापानी गाविसका वडा नम्बर- ६, ७, ८ र ९ का नागरिक प्रत्यक्ष रुपमा लाभान्वित हुनेछन् ।”
उद्घाटन कार्यक्रममा स्वास्थ्य केन्द्र निर्माणका लागि नौ आना जग्गा निःशुल्क प्रदान गर्नुहुने जग्गादाता र उपभोक्ता समितिका पदाधिकारीहरुलाई समेत सम्मान सहित प्रशंसा पत्र प्रदान गरिएको छ । निःशुल्क प्रदान गर्नुहुने जग्गादाता सन्तोष राई, उपभोक्ता समितिका अध्यक्ष मानबहादुर मगर, सचिव होमबहादुर बोगटी, खड्गबहादुर मगर र कोषाध्यक्ष शान्ता खनाललाई सम्मान तथा प्रशंसा पत्र प्रदान गरिएको प्रमुख निरौलाले बताउनुभयो ।
