खोटाङ, १५ जेठ । प्रगतीशिल युवा सञ्जाल खोटाङले धार्मिक तथा पर्यटकीयस्थल मझुवागढी परिषर सरसफाई गरेको छ । प्रगतिशील युवा सञ्जालले दिक्तेलको धार्मिक तथा पर्यटकीयस्थल मझुवागढीस्थित कालिका भगवती देविस्थान जाने सिँढी तथा गढी परिषर आसपासमा यत्रतत्र छरिएका फोहोरमैला शनिबार सरसफाई गरेको हो ।
दर्शन एवम भ्रमणका लागि मझुवागढी जाने स्थानीयले जथाभावी मिल्काएका शिशा तथा प्लाष्टिकका बोत्तल, बिस्कुट, चाउचाउलगायतका फोहोरमैला संकलन गरेर जलाइएको प्रगतीशिल युवा सञ्जालका अध्यक्ष यलम्बर राईले बताउनुभयो ।
दैनिकजसो दर्शन गर्ने र भ्रमण गर्नेको ओहोर–दोहोर हुने मझुवागढीमा फोहोरमैला उचित व्यवस्थापन हुन नसकेको अवस्थामा युवाले सरसफाई अभियान चलाएको हो । केही समयपछि पनि मझुवागढी सरसफाई अभियानलाई निरन्तरता दिइने सञ्जालले जनाएको छ । सञ्जालले मझुवागढीमा लगातार दुई पटक सरसफाई गर्ने योजना अघि सारेको छ ।
गढीको स्वच्छता र सुन्दरताका लागि फोहोरमैला संकलन गर्न युवाले दुई स्थानमा बाँसको डस्बिन राखिदिएका छन् । सरसफाई अभियानमा सञ्जालमा आवद्ध १८ युवाको सहभागीता रहेको थियो । समाजमा हरेक क्षेत्रमा भएका बिकृति र बिसंगती बिरुद्ध अभियान चलाउने लक्ष्यका साथ स्थापना गरिएको सञ्जालमा जिल्लाका ५० युवा आवद्ध छन् ।
समाजका खराब कामलाई निरुत्साहित गर्दै सकरात्मक कामलाई प्रोत्साहित गर्नेगरी अभियान थालिएको सञ्जालका प्रधान व्यवस्थापक चिरन्जिवी रिजालले जानकारी दिनुभयो ।
