खोटाङ,२३ जेष्ठ । जिल्लाको साकेला गाउँपालिकाले शैक्षिक क्षेत्रको गुणस्तर सुधारका लागि छलफल अभियान संचालन गरेको छ। पालिकाभित्रका सबै विद्यालयहरूको शैक्षिक गुणस्तर सुधारका लागि छलफल गरेको गाउँपालिकाले जनाएको छ ।
विद्यार्थीलाई उचित शिक्षा प्रदान गर्ने उद्धेश्यले विद्यालयका प्रधानाध्यापक, शिक्षक तथा कर्मचारीबिच छलफल गरिएको गाउँपालिका प्रमुख रविप्रकाश राईले बताउनुभयो। ‘पाठ्यक्रम, शिक्षण सिकाई क्रियाकलाप, परीक्षा र मूल्याङकनका कमी कमजोरीहरूलाई एकसाथ उजागर गर्नका लागि छलफलको आयोजना गरिएको हो।’ प्रमुख राईले भन्नुभयो।
व्यावसायिक, सीपमूलक, रोजगारमूलक जीवनोपयोगी एवम् गुणस्तरीय शिक्षामा सवैको सहज, सरल, सुलभ र समान पहुँच सुनिश्चित गर्ने उद्धेश्य राखेर बृहत छलफलको आयोजना गरिएको शिक्षा शाखा प्रमुख कविराज राईले बताउनुभयो।
