खोटाङ । खोटाङको साकेला गाउँपालिकाको प्रशासकीय भवन शिलान्यास गरिएको छ । सोमबार एक कार्यक्रमको आयोजना गरी साकेला गाउँपालिकाका अध्यक्ष रवीप्रकाश राईले प्रशासकीय भवनको शिलान्यास गर्नुभएको हो ।
संघीय सरकारको ६० प्रतिशत र साकेला गाउँपालिकाको ४० प्रतिशत लागत साझेदारीमा तीन तले बाल लैङ्गिक तथा अपाङ्ग मैत्री उक्त भवन गाउँपालिका र निर्माण कम्पनीबीच भएको सम्झौताअनुसार निर्माण व्यवसायीले एक वर्ष ६ महिना भित्रमा काम सम्पन्न गर्नुपर्ने साकेला गाउँपालिकाका अध्यक्ष राईले बताउनुभयो ।
साकेला गाउँपालिका-४ मानेभन्ज्याङ्गस्थित आफ्नै स्वामित्वको जग्गामा निर्माण हुन लगेको प्रशासकीय भवनको सम्झौता भ्याटसहित सात करोड बैसठ्ठी लाख पैतिस हजार एक सय बाउन्न रुपैँया छयहत्तर पैसामा गत असार २० गते श्री मल्ल रानी /संजिव जेभीले सम्झौता गरेको थियो । सम्झौता पश्चात भवन निर्माणको कार्य अगाडी बढाएको साकेला गाउँपालिकाका इन्जिनीयर असिश राईले जानकारीदिनुभयो ।
“नागरिकको सेवा प्रवाहलाई प्रभावकारी बनाउन भवनको महत्वपूणर् भूमिका हुन्छ । अध्यक्ष राईले भन्नुभयो, “भवन युगान्तकारी प्रशासकीय भवनकोरूपमा निर्माण हुने र यहीँबाट साकेला गाउँपालिकाको प्रशासकीय खाका कोरी समृद्धि भित्र्याउने घरकोरूपमा यो स्थापना हुने छ ।” तोकिएको समयमा काम सम्पन्न गर्न निर्माण कम्पनलाई अध्यक्ष राईले निर्देशनसमेत दिनुभएको छ ।
हालसम्म गाउँपालिकाको कार्यालय मानेभञ्ज्याङस्थित साबिकको ईलाका कृषि तथा पशु सेव केन्द्रको संरचनामा सञ्चालन भइ रहेको गाउँपालिकाका उपाध्यक्ष बिर्सिका राईले बताउनुभयो । उहाँले भन्नुभयो, “अब निर्माण हुने प्रशासकीय भवनबाट हामीले नागरिकलाई सेवा दिन सहज हुने छ ।”
यस्तै, साकेला गाउँपालिकाको नियमित हाटबजार लाग्ने स्थान मानेभञ्ज्याङमा नव-निर्मित बजारको अध्यक्ष राईले रिबन काटेर औपचारिकरूपमा उद्घाटन गर्नु भएको साकेला गाउँपालिकामा कार्यरत खरिदार सुवास राईले जानकारी दिनुभयो ।
शिल्यान्यास कार्यक्रममा प्रमुख प्रशासकीय अधिकृत महेश राई, पाँच वडाका वडा अध्यक्ष , गाउँकार्यपालिकाका सदस्यहरू, विभिन्न राजनितीक दलका प्रतिनिधिहरू तथा संघ-संस्थाका प्रतिनिधिहरू, निर्माण कम्पनीका प्रतिनीधि, गाउँपालिकामा कार्यरत कर्मचारीहरू र स्थानीय नागरिकहरूको उपस्थितिमा प्रशासकीय भवनको शिलान्यास गरिएको थियो ।
