खोटाङ । नेकपा (एमाले) निकट अखिल नेपाल राष्ट्रिय स्वतन्त्र विद्यार्थी युनियन खोटाङको २४ औं अधिवेशन आगामी मंसिरमा हुने भएको छ । सोमबार नेकपा (एमाले) पार्टी कार्यालय पुष्पलाल स्मृति भवनमा कमिटिका संयोजक यम खड्काको अध्यक्षतामा बसेको बैठकले आगामी मंसिर २९ र ३० गते ऐसेलुखर्कबजारस्थित त्रिभुवन माध्यमिक विद्यालयमा अधिवेशन गर्ने निणर्य गरेको हो ।
प्रमुख आतिथि केन्द्रीय अध्यक्ष समीककुमार बडालको प्रमुख आतिथ्यतामा जिल्लास्थित ऐसेलुखर्कमा अधिवेशन गर्ने निणर्य भएको पत्रकार सम्मेलनमार्फत बताइएको छ । अनेरास्ववियुका जिल्ला संयोजक खड्काको संयोजकत्वमा अधिवेशन मुल व्यवस्थापन समिती, संगठनका जिल्ला इन्चार्ज मोहन संग्रामको संयोजकत्वमा आर्थिक व्यवस्थापन उपसमिती गठन गरिएको छ । सह-संयोजक विष्णु उपरकोटीको संयोजकत्वमा प्रचार-प्रसार उपसमिती, सुरेश प्रधानको संयोजकत्वमा स्वयंसेवक परिचालन उपसमिति र अभिषेक घिमिरेको संयोजकत्वमा प्रतिनिधि व्यवस्थापन उपसमिती निर्माण गरिएको बताइएको छ ।
यस्तै, अधिवेशन अगाडि दश स्थानीय तहभरिका ३९ वटा दशजोड २ माध्यामिक विद्यालयहरुमा सङ्गठन विस्तार गरिने जनाइएको छ ।
आयोजक कमिटीका सबै माध्यामिक विद्यालय कमिटीबाट १-१ जना, क्याम्पस कमिटीबाट १ महिलासहित ३ जना, सिटिइभिटीबाट १ महिलासहित ३ जना, गाउँपालिका कमिटीबाट २ महिलासहित ५ जना नगर कमिटीबाट ३ महिलासहित ७ गरि १६८ जना प्रतिनिधि अधिवेशनमा सहभागी हुनेछन्
अधिवेशनका लागि `विद्यार्थी हितमा केन्द्रित सुदृढ सङ्गठन नयाँ शिराबाट अबको शैक्षिक आन्दोलन´ भन्ने नारा तय गरिएको छ। अनेरास्ववियुले अधिवेशनका लागि लोगो समेत सार्वजनिक गरेको छ ।
